आइतवार, कार्तिक २२ गते २०८३
शनिवार , कार्तिक २१, २०८३
नेपालसेज, काठमाडौं ।
प्रधानमन्त्री वालेन्द्र शाहले काग तिहारको अवसरमा शुभकामना व्यक्त गरेका छन्।
कागलाई यमराजको दूतका रूपमा सम्मान गर्ने परम्पराको चर्चा गरेका छन्।
धन्वन्तरी जयन्तीमा सबैको निरोगी जीवनको कामना गरेका छन्।
कुकुर तिहारले मानिस र अन्य जीवबीचको सहअस्तित्व र सद्भावलाई प्रगाढ बनाउने बताएका छन्।
पर्वहरूले सत्य, न्याय र इमानदारीको बाटोमा अघि बढ्न प्रेरणा दिनुपर्ने उल्लेख गरेका छन्।
.jpeg)
प्रधानमन्त्री वालेन्द्र शाहले यमपञ्चकको पहिलो दिन तथा काग तिहार, धन्वन्तरी जयन्ती र भोलि मनाइने कुकुर तिहारको अवसरमा शुभकामना व्यक्त गरेका छन्। उनले सामाजिक सञ्जालमार्फत शुभकामना सन्देश जारी गर्दै नेपाली संस्कृति, परम्परा र चाडपर्वले मानव तथा अन्य जीवबीचको सम्बन्धलाई आत्मीय बनाउने बताएका छन्।
प्रधानमन्त्री शाहले काग तिहारको अवसरमा आदरणीय आमाबुबा, दिदीबहिनी तथा दाजुभाइहरूमा हार्दिक शुभकामना व्यक्त गरेका छन्। उनले यमराजको दूत मानिने कागलाई मीठा परिकार खुवाएर सम्मान गर्ने परम्पराको चर्चा गर्दै प्राचीन समयमा काग कराउँदा कतैबाट समाचार वा पाहुना आउन लागेको विश्वास गरिने गरेको उल्लेख गरेका छन्।
उनले घरको आँगनमा काग कराउँदा ‘शुभ बोल, शुभ बोल’ भन्दै खबरको प्रतीक्षा गर्ने तथा ‘काकेन दधि भक्षितम्’ भन्दै दही–भात दिएर शुभ सन्देश पुर्याउने कामना गर्ने प्रचलन रहेको बताएका छन्। साथै, परिवारका सदस्यका नाममा यम दीपदान गर्ने परम्पराको उल्लेख गर्दै यमराजलाई डरको प्रतीक मात्र नभई न्यायको प्रतीकका रूपमा समेत बुझिने गरेको बताएका छन्।
यसैगरी, धन्वन्तरी जयन्तीका अवसरमा भगवान् धन्वन्तरीको स्मरण गर्दै प्रधानमन्त्री शाहले सबैको निरोगी जीवनको कामना गरेका छन्। समुद्र मन्थनबाट अमृत कलश लिएर प्रकट हुनुभएका आयुर्वेदका प्रवर्तक तथा आरोग्यका देवता भगवान् धन्वन्तरीको महत्त्व उल्लेख गर्दै उनले सबैमा स्वास्थ्य र आरोग्यको शुभकामना व्यक्त गरेका छन्।
भोलि मनाइने कुकुर तिहारबारे उनले मानव सभ्यताको विश्वासिलो र वफादार साथी कुकुरप्रतिको प्रेम तथा कृतज्ञता प्रकट गर्ने पर्वका रूपमा व्याख्या गरेका छन्। घरको सुरक्षादेखि अनुसन्धान र उद्धार कार्यसम्म मानिसलाई साथ दिने कुकुरलाई पूजा गर्ने यस पर्वले अन्य जीवप्रतिको सहअस्तित्व र सद्भावलाई अझ प्रगाढ बनाउने विश्वास उनले व्यक्त गरेका छन्।
प्रधानमन्त्री शाहले सत्य, न्याय र इमानदारीको बाटोमा अडिग रहेर समाजमा सुशासन र जनपक्षीय काम गर्ने प्रेरणा चाडपर्वहरूले दिनुपर्ने बताएका छन्। उनले आफ्नो सन्देशको अन्त्यमा ‘जय देश, जय संस्कृति’ उल्लेख गरेका छन्।
— नेपालसेज | प्रकाशित: २१ कात्तिक २०८३
Be the first to comment!
.gif)
प्रतिक्रिया दिनुहोस