नेपालसेज/ म्याग्दी — म्याग्दीको अन्नपूर्ण गाउँपालिका–४ नारच्याङस्थित मौरिस हर्जोग पदमार्गको प्रवेशद्वार बाँस्कोटमा पर्यटक सूचना केन्द्र तथा चेकपोस्ट स्थापना गरिएको छ। अन्नपूर्ण संरक्षण क्षेत्र आयोजना (ACAP) र स्थानीय संरक्षण क्षेत्र व्यवस्थापन समितिको पहलमा स्थापना गरिएको केन्द्रबाट अन्नपूर्ण आधार शिविर जाने आन्तरिक तथा बाह्य पर्यटकको तथ्याङ्क सङ्कलन, अभिलेख व्यवस्थापन र पदमार्ग तथा आधार शिविरबारे जानकारी उपलब्ध गराइनेछ। साथै, पदयात्राका क्रममा पर्यटकलाई आवश्यक सहजीकरणसमेत गरिनेछ।

सम्पादकीय सारांश

Verified

म्याग्दीको नारच्याङस्थित मौरिस हर्जोग पदमार्गको प्रवेशद्वार बाँस्कोटमा सूचना केन्द्र स्थापना गरिएको छ।

अन्नपूर्ण संरक्षण क्षेत्र आयोजना (ACAP) र स्थानीय संरक्षण क्षेत्र व्यवस्थापन समितिको पहलमा केन्द्र स्थापना भएको हो।

केन्द्रबाट पर्यटकको तथ्याङ्क सङ्कलन र पदमार्ग तथा आधार शिविरबारे जानकारी दिइनेछ।

तिहारसम्म एक र त्यसपछि दुई जना कर्मचारी राखेर नियमित सेवा सञ्चालन गरिनेछ।

अन्नपूर्ण प्रथमको ४ हजार ५० मिटर उचाइमा रहेको आधार शिविर पुग्न हुमखोलाबाट करिब २१ किलोमिटर पैदल यात्रा गर्नुपर्छ।

सूचना केन्द्रको बुधबार अन्नपूर्ण गाउँपालिकाका अध्यक्ष भारतकुमार पुन र ACAP का निर्देशक रविन कडरियाले संयुक्त रूपमा उद्घाटन गरेका छन्।

ACAP घान्द्रुकका संरक्षण अधिकृत भीम पौडेलका अनुसार आधार शिविर जाने पर्यटकको विवरण व्यवस्थित राख्ने, पदमार्ग तथा आधार शिविरबारे जानकारी दिने र पदयात्राका क्रममा पालना गर्नुपर्ने नियम तथा पर्यटकीय सूचनाबारे जानकारी उपलब्ध गराउने उद्देश्यले केन्द्र स्थापना गरिएको हो।

संरक्षण क्षेत्र व्यवस्थापन समिति नारच्याङका अध्यक्ष तथा मौरिस हर्जोग पदमार्गका अभियन्ता तेज गुरुङले केन्द्रबाट पर्यटकको विवरण सङ्कलन, सूचना प्रवाह र पदयात्राका क्रममा आइपर्ने समस्या समाधानका लागि सहजीकरण गरिने बताएका छन्। उनका अनुसार तिहारसम्म एक जना र त्यसपछि दुई जना कर्मचारी राखेर केन्द्र नियमित सञ्चालन गरिनेछ।

पछिल्लो समय आन्तरिक पर्यटकको आकर्षण बढ्दै गएको अन्नपूर्ण प्रथम हिमालको उत्तरी आधार शिविर ४ हजार ५० मिटर उचाइमा अवस्थित छ। समुद्री सतहबाट ८ हजार ९१ मिटर अग्लो अन्नपूर्ण प्रथम हिमालको आधार शिविरसम्म पुग्ने मौरिस हर्जोग पदमार्ग प्राकृतिक सौन्दर्य र साहसिक पदयात्राका लागि आकर्षक गन्तव्यका रूपमा विकास भइरहेको छ।

‘जेठो हिमाल’का रूपमा चिनिने अन्नपूर्ण प्रथमको आधार शिविर पुग्न नारच्याङको बेँसी गाउँबाट बाँस्कोट, दोभान, छोटेपा हुँदै हुमखोलासम्म करिब २० किलोमिटर सडक यात्रा गर्नुपर्छ। हुमखोलाबाट करिब २१ किलोमिटर पैदल यात्रा गरी दुई दिनमा आधार शिविर पुग्न सकिन्छ।

पदमार्गमा पर्ने फुतफुते झरना, आधार शिविरस्थित पञ्चकुण्ड ताल र वरिपरिका हिमशृङ्खलाको प्राकृतिक दृश्यले यस क्षेत्रको पदयात्रालाई थप आकर्षक बनाएको छ।

अन्नपूर्ण गाउँपालिकाले पदमार्ग तथा आधार शिविर क्षेत्रमा पर्यटकीय पूर्वाधार निर्माण, पदमार्ग मर्मतसम्भार र झोलुङ्गे पुल निर्माण गरेपछि पदयात्रा सहज बनेको छ। गाउँपालिकासँग सम्झौता गरी निजी क्षेत्रले पदमार्गका विभिन्न स्थानमा टी–शप, होटल तथा रेस्टुरेन्ट सञ्चालन गरेपछि पर्यटकका लागि खान र बस्न थप सुविधा उपलब्ध भएको छ।

पर्यटक सूचना केन्द्र स्थापनासँगै अन्नपूर्ण आधार शिविर आउने पर्यटकको अभिलेख व्यवस्थित हुनुका साथै पर्यटकीय सूचना र सेवा प्रवाह प्रभावकारी हुने अपेक्षा गरिएको गाउँपालिकाका अध्यक्ष पुनले बताएका छन्।

— नेपालसेज | प्रकाशित: १९ कात्तिक २०८३