नेपालसेज | काठमाडौं। नेपाली कांग्रेसका सभापति गगनकुमार थापाले पार्टी नेतृत्वमा निर्वाचित भएपछि पहिलो पटक नेकपा एमालेका अध्यक्ष एवं पूर्वप्रधानमन्त्री केपी शर्मा ओलीसँग भेटवार्ता गरेका छन् । मंगलबार साँझ थापा भक्तपुरको गुण्डुस्थित ओली निवास पुगेका हुन्। ओलीसँग थापाले करिब एक घण्टा कुराकानी गरेकाे उनकाे सचिवालयले पुष्टि गरेकाे छ। एमाले अध्यक्ष ओलीको सचिवालयले पनि भेट भएको पुष्टि गरेको छ। प्रारम्भिक विवरणअनुसार थापा पूर्वनिर्धारित कार्यक्रमबिना नै ओलीसँग समय लिएर केही नेतासहित उनको निवास पुगेका हुन् । दुई नेताबीच पछिल्लो राजनीतिक घटनाक्रम र समसामयिक विषयमा छलफल भएको बताइएको छ।

सम्पादकीय सारांश

Verified

कांग्रेस सभापति गगनकुमार थापा मंगलबार साँझ ओली निवास गुण्डु पुग्नुभयो।

दुई नेताबीच करिब एक घण्टा भेटवार्ता भएको छ।

सभापति बनेपछि थापाको ओलीसँग यो पहिलो भेट भएको हो।

भेटमा समसामयिक राजनीतिक घटनाक्रम र मधेश सरकारबारे छलफल भएको स्रोतको दाबी।

पछिल्लो समय सरकार र विपक्षी दलहरूबीच राजनीतिक दूरी बढिरहेका बेला भेटलाई चासोका साथ हेरिएको छ।

ओलीनिकट एक नेताका अनुसार थापा आकस्मिक रूपमा ओली निवास पुगेका थिए। पूर्वनिर्धारित कार्यक्रम नरहेपछि तत्काल समय लिएर उनले केही नेतासहित गुण्डु पुगेकाे बताइएको छ। भेटका क्रममा केही समय दुवै पार्टीका प्रमुख नेताबीच एक्लाएक्लै कुराकानी भएको स्रोतको भनाइ छ।

सभापति थापानिकट स्रोतकाअनुसार भेटमा मधेश प्रदेश सरकारको विषयमा समेत छलफल भएको दाबी गरिएको छ। यद्यपि भेटमा भएका सबै विषय र छलफलको आधिकारिक विवरण सार्वजनिक भएको छैन

पछिल्लो समय प्रधानमन्त्री बालेन्द्र शाह नेतृत्वको सरकार र प्रमुख प्रतिपक्षी दल नेपाली कांग्रेसबीच विभिन्न विषयमा मतभेद देखिँदै आएको छ। कांग्रेस सभापति थापाले सरकारका कामकारबाही, अभिव्यक्ति स्वतन्त्रता र राज्य सञ्चालनको शैलीबारे सार्वजनिक रूपमा प्रश्न उठाउँदै आएका छन् । 

यसअघि, सिंहदरबारमा विपक्षी दलहरूको बैठकसमेत बसेको थियो। प्रमुख विपक्षी दल नेपाली कांग्रेसका नेता भीष्मराज आङ्दाम्बेले सभामुख डोलप्रसाद अर्यालसँग भेट गरी सरकारका कामकारबाहीबारे असन्तुष्टि व्यक्त गरेका थिए । विपक्षी दलहरूबीच सरकारका गतिविधिमाथि सदन तथा सडक दुवै माध्यमबाट प्रश्न उठाउने विषयमा छलफल भइरहेको जनाइएको छ।

सरकार र विपक्षी दलहरूबीच राजनीतिक टकराव बढिरहेका बेला कांग्रेस सभापति थापा र एमाले अध्यक्ष ओलीबीच भएको भेटलाई राजनीतिक वृत्तमा चासोका साथ हेरिएको छ।

— नेपालसेज | प्रकाशित: १७ कात्तिक २०८३