बुधवार, कार्तिक २५ गते २०८३
नेपाल संवत्, म्हः पूजा र गोवर्धन पूजाले सांस्कृतिक पहिचान, आत्मबल र सामाजिक सद्भाव बलियो बनाउने प्रधानमन्त्रीको सन्देश
मंगलवार , कार्तिक २४, २०८३
प्रधानमन्त्री वालेन्द्र शाहले नेपाल संवत् ११४७ तथा म्हः पूजाको शुभकामना दिएका छन्।
राष्ट्रिय विभूति शङ्खधर साख्वाःको योगदानलाई नेपालको मौलिक पहिचानसँग जोडेका छन्।
म्हः पूजाले आत्मशुद्धि र चेतनाको बोध गराउने उल्लेख गरेका छन्।
गोवर्धन पूजा र हली तिहारको सांस्कृतिक महत्त्व स्मरण गरेका छन्।
चाडपर्वले सामाजिक एकता र सहिष्णुता बलियो बनाउने विश्वास व्यक्त गरेका छन्।
.jpeg)
नेपालसेज, काठमाडौं । प्रधानमन्त्री वालेन्द्र शाहले नेपाल संवत् ११४७ (न्हूदँया भिन्तुना) तथा म्हः पूजाको अवसरमा स्वदेश तथा विदेशमा रहेका नेपालीहरूलाई शुभकामना दिएका छन्। उनले नेपाल संवत्लाई राष्ट्रिय विभूति शङ्खधर साख्वाःले देशभरका जनतालाई ऋणमुक्त पारेर सुरु गराएको नेपालको मौलिक समयचक्र र पहिचानका रूपमा उल्लेख गरेका छन्। म्हः पूजाको सांस्कृतिक तथा आध्यात्मिक महत्त्व स्मरण गर्दै उनले यसले आत्मशुद्धि र चेतनाको बोध गराउने बताएका छन्। नेवार समुदायको मौलिक परम्पराले आपसी सद्भाव, आत्मबल र पुर्ख्यौली संस्कृतिको संरक्षणमा योगदान पुर्याउँदै आएको उनको भनाइ छ। साथै, गोवर्धन पूजा, हली तिहार तथा देउसी–भैलोजस्ता पर्वले सामाजिक आत्मीयता र सहिष्णुतालाई बलियो बनाउने विश्वास उनले व्यक्त गरेका छन्।
प्रधानमन्त्री शाहले म्हः पूजाको मर्मलाई आफ्नै शरीर र त्यसमा रहेको चेतनालाई साक्षी राखेर गरिने आत्मपूजासँग जोडेका छन्। अष्टचिरञ्जीवीको प्रतीक मण्डपमा आफैँले आफैँलाई पूजा गर्ने परम्पराले आत्मशुद्धि र चेतनाको बोध गराउने उनले उल्लेख गरेका छन्।
उनका अनुसार यस मौलिक परम्पराले नेवार समुदायभित्र आपसी सद्भाव र आत्मबल बढाउनुका साथै पुर्ख्यौली संस्कृतिको संरक्षण तथा जातीय एकतालाई प्रगाढ बनाउन सहयोग गरेको छ।
प्रधानमन्त्रीले गोवर्धन पूजा तथा हली तिहारको महत्त्वसमेत स्मरण गरेका छन्। भगवान् श्रीकृष्णले गोवर्धन पर्वत उठाएर द्वारिकावासीलाई बचाएको पौराणिक मान्यतासँग जोडिएको यस पर्वमा कृषिकर्मका सहयात्री गोरुलाई पिठो, नुन र बावर खुवाउने तथा हलो, फालीलगायत कृषि औजारको पूजा गर्ने परम्परा रहेको उनले उल्लेख गरेका छन्।
त्यसैगरी, भैलो र देउसीका भाकाले छरछिमेकमा आत्मीयता र सद्भाव बढाउने भन्दै उनले चाडपर्वका अवसरमा आपसी रिसराग भुलेर सामाजिक एकता र सहिष्णुताको भावना बलियो बनाउन आग्रह गरेका छन्।
शाहले सबैको जीवनमा सुख, शान्ति, समृद्धि र उत्तरोत्तर प्रगतिको कामना गर्दै शुभकामना सन्देश दिएका छन्।
— नेपालसेज | प्रकाशित: २४ कात्तिक २०८३
Be the first to comment!
.gif)
प्रतिक्रिया दिनुहोस