नेपालसेज / काठमाडौं ।
९ असोजयता आएको बाढी र पहिरोले देशभर सडक, पुल, खानेपानी तथा ऊर्जा पूर्वाधारमा ठूलो क्षति पुर्‍याएको छ। पूर्वाधार विकास मन्त्रालयको प्रारम्भिक विवरणअनुसार कालीगण्डकी करिडोरअन्तर्गत विभिन्न सडकखण्ड तथा पुलका एप्रोच सडक बगेका छन्। डुम्रे–बेँसीसहर–चामे सडकखण्डमा समेत नदी कटान र पहिरोका कारण सडक भासिने तथा अवरुद्ध हुने समस्या देखिएको छ। बाढीले विभिन्न झोलुङ्गे पुलमा पूर्ण तथा आंशिक क्षति पुर्‍याएको छ भने ३१ वटा खानेपानी आयोजनामा समेत क्षति पुगेको प्रारम्भिक विवरण छ। क्षतिग्रस्त सडक तथा अन्य पूर्वाधार पुनः सञ्चालनका लागि काम सुरु गरिएको मन्त्रालयले जनाएको छ।

सम्पादकीय सारांश

Verified

बाढी–पहिरोले सडक, पुल र खानेपानी आयोजनामा क्षति

कालीगण्डकी करिडोर र डुम्रे–बेँसीसहर–चामे सडक प्रभावित

३१ खानेपानी आयोजनामा क्षति

७८३ मेगावाट क्षमताका जलविद्युत् आयोजना प्रभावित

जलविद्युत् क्षेत्रमा १ खर्ब ३४ अर्ब ६९ करोड रुपैयाँको प्रारम्भिक क्षति

कालीगण्डकी करिडोरअन्तर्गत म्याग्दीको पोखरेबगर, बागलुङको मालढुंगा तथा तनहुँ–नवलपरासीको देदगाउँ क्षेत्रमा पुलका एप्रोच सडक बगेका छन्। कालीगण्डकी नदीमा रहेको पक्की पुलसमेत बाढीका कारण बगेको मन्त्रालयको प्रारम्भिक विवरणमा उल्लेख छ। यस्तै, डुम्रे–बेँसीसहर–चामे सडकखण्डमा पनि बाढी तथा नदी कटानका कारण विभिन्न स्थानमा ठूलो क्षति पुगेको छ।

लमजुङको रामबजार–स्याङ्गे क्षेत्रमा मर्स्याङ्दी नदीको कटानका कारण करिब ४० मिटर सडक पूर्णरूपमा भासिएको छ। मनाङको नासो–खोत्रो क्षेत्रमा ढुंगासहितको पहिरोका कारण सडक अवरुद्ध भएको छ। नासो–बगरछाप क्षेत्रमा पनि मर्स्याङ्दी नदीको कटानले करिब ५० मिटर सडक पूर्णरूपमा भासिएको छ। चामे क्षेत्रमा बाढीले तीन वटा अस्थायी काठे पुल बगाएको छ।

बाढी र पहिरोले काठमाडौं उपत्यका जोड्ने पृथ्वी राजमार्ग, बीपी राजमार्ग र कान्ति लोकमार्गसहित विभिन्न सडकखण्डमा क्षति पुगेको छ। रुकुम पूर्वको नाथीगाड झोलुङ्गे पुल तथा बागलुङ–पर्वत जलजला फोर्से झोलुङ्गे पुलमा पूर्ण क्षति पुगेको छ। तनहुँ, नवलपुर, स्याङ्जा, पाल्पा, पर्वत र म्याग्दी जोड्ने विभिन्न झोलुङ्गे पुलमा पनि आंशिक क्षति पुगेको मन्त्रालयले जनाएको छ।

ऊर्जा, जलस्रोत तथा सिँचाइ मन्त्रालयका अनुसार बाढीबाट जलविद्युत् आयोजनामा मात्रै प्रारम्भिक रूपमा १ खर्ब ३४ अर्ब ६९ करोड रुपैयाँ बराबरको क्षति भएको छ। बाढीका कारण ७८३ मेगावाट क्षमताका जलविद्युत् आयोजना प्रभावित भएका छन्। प्रभावित आयोजनामध्ये कालीगण्डकी जलविद्युत् आयोजना पुनः सञ्चालनमा ल्याउने तयारी गरिएको छ।

बाढी र पहिरोबाट क्षतिग्रस्त संरचनाको पुनर्निर्माणका लागि तत्काल बजेट व्यवस्थापन गरी टेन्डर प्रक्रियामार्फत काम अघि बढाउने तयारी गरिएको छ। पूर्वाधार विकासमन्त्री सुनिल लम्सालले प्रभावित क्षेत्रका जनप्रतिनिधिसँग छलफल गर्दै क्षतिको मूल्यांकनपछि पुनर्निर्माण अघि बढाउने बताएका छन्। अस्थायी आवास व्यवस्थापन तथा क्षतिग्रस्त भौतिक संरचना पुनर्निर्माणको काम असोजभित्रै सुरु गर्ने प्रतिबद्धता पनि उनले जनाएका छन्।