बुधवार, कार्तिक २५ गते २०८३
कर्फ्यु जारी रहेकै बेला समूहहरू सडकमा उत्रिएपछि स्थानीय प्रशासनले नेपाली सेनालाई 'स्ट्यान्डबाइ'बाट सक्रिय सुरक्षा व्यवस्थापनमा परिचालन गरेको छ।
सोमवार , श्रावण ११, २०८३
सुनसरीको देवानगञ्ज गाउँपालिका–३ अन्तर्गत पर्ने कप्तानगञ्ज क्षेत्रमा जारी कर्फ्युका बीच पनि केही समूह सडकमा निस्किएपछि सुरक्षा व्यवस्था थप कडा बनाइएको छ। स्थानीय प्रशासनले नेपाल प्रहरी र सशस्त्र प्रहरी बलसँगै नेपाली सेनालाई पनि सुरक्षा व्यवस्थापनमा परिचालन गरेको जनाएको छ। सेनाको उपस्थितिपछि बजार, मुख्य चोक तथा संवेदनशील स्थानहरूमा संयुक्त सुरक्षा निगरानी सुरु गरिएको छ। जिल्ला प्रशासन कार्यालयले जारी गरेको कर्फ्यु आदेशको उद्देश्य थप हिंसा रोक्नु र दुई समुदायबीचको तनाव फैलिन नदिनु रहेको बताएको छ। तर केही स्थानमा मानिसहरू भेला हुने, नाराबाजी गर्ने तथा कर्फ्यु उल्लङ्घन गर्ने प्रयास भएपछि सुरक्षा संयन्त्रलाई थप मजबुत बनाइएको हो। प्रशासनले कानुन उल्लङ्घन गर्नेविरुद्ध कारबाही हुने चेतावनी पनि दिएको छ।
.jpeg)
नेपाली सेनाको परिचालनलाई प्रशासनले कानुन तथा शान्ति–सुरक्षा कायम राख्न गरिएको समन्वयात्मक कदम भनेको छ। सेनाले प्रहरीसँग मिलेर मुख्य सडक, बजार क्षेत्र, धार्मिक स्थल र संवेदनशील बस्तीमा सुरक्षा घेरा बनाएको छ। स्थानीय बासिन्दालाई घरभित्रै बस्न र अनावश्यक रूपमा बाहिर ननिस्कन आग्रह गरिएको छ।
यसअघि आइतबार राति दुई समुदायबीच भएको झडपमा प्रहरीको गोली लागेर एक जनाको मृत्यु भएको थियो भने दुई दर्जनभन्दा बढी व्यक्ति घाइते भएका थिए। त्यस घटनापछि देवानगञ्ज, कप्तानगञ्ज, घुस्की, भण्टाबारी र भुटाहालगायतका क्षेत्रमा अनिश्चितकालीन कर्फ्यु लागू गरिएको थियो। अहिले सुरक्षा निकायले अवस्था नियन्त्रणमा रहेको जनाए पनि तनाव पूर्ण रूपमा साम्य नभएकाले सतर्कता कायम राखिएको छ।
Be the first to comment!
.gif)
प्रतिक्रिया दिनुहोस