आइतवार, आश्विन ४ गते २०८३
कोशी, बागमती र गण्डकीका हिमाली तथा पहाडी क्षेत्रमा विशेष जोखिम; बाढी, पहिरो र गेग्रान बहावको चेतावनी
सोमवार , भाद्र २२, २०८३
NepalSays/ काठमाडौं
जल तथा मौसम विज्ञान विभागले आगामी तीन दिन देशका विभिन्न क्षेत्रमा वर्षा हुने र केही स्थानमा भारी वर्षाको सम्भावना रहेको जनाएको छ। विभागको मौसम पूर्वानुमान महाशाखाले सोमबार बिहान जारी गरेको बुलेटिनअनुसार भदौ २२ देखि २४ गतेसम्म मनसुनी वायुको प्रभाव देशभर रहनेछ। विभागका अनुसार सोमबार कोशी, बागमती र गण्डकी प्रदेशका हिमाली तथा पहाडी भूभागमा भारी वर्षाको सम्भावना छ। सुदूरपश्चिम प्रदेशका पहाडी तथा तराई भूभागका एक–दुई स्थानमा पनि भारी वर्षा हुन सक्ने पूर्वानुमान गरिएको छ।
भदौ २२ देखि २४ गतेसम्म देशभर मनसुनी वायुको प्रभाव रहने।
कोशी, बागमती र गण्डकीका हिमाली तथा पहाडी क्षेत्रमा भारी वर्षाको सम्भावना।
सुदूरपश्चिमका पहाडी तथा तराईका एक–दुई स्थानमा पनि भारी वर्षा हुन सक्ने।
भारी वर्षाका कारण बाढी, पहिरो, भूक्षय र गेग्रान बहावको जोखिम बढ्ने।
सडक, हवाई यातायात, कृषि, पर्यटन तथा दैनिक जनजीवन प्रभावित हुन सक्ने विभागको चेतावनी।
मंगलबार पनि कोशी, बागमती र गण्डकीका हिमाली तथा पहाडी क्षेत्रमा भारी वर्षाको सम्भावना कायम रहनेछ। लुम्बिनी प्रदेशका पहाडी तथा तराई भूभागका एक–दुई स्थानमा समेत भारी वर्षा हुन सक्ने विभागले जनाएको छ। बुधबार कोशी, बागमती र गण्डकीका हिमाली तथा पहाडी भूभागमा वर्षाको सम्भावना रहनेछ भने लुम्बिनीको पहाडी तथा तराई क्षेत्रमा पनि केही स्थानमा भारी वर्षा हुन सक्ने पूर्वानुमान छ। देशका अधिकांश पहाडी क्षेत्रमा मेघगर्जन र चट्याङसहित मध्यम वर्षाको सम्भावना रहेको छ।
.jpeg)
विभागले भारी वर्षाका कारण गेग्रान बहाव, बाढी, पहिरो तथा भूक्षयको जोखिम बढ्न सक्ने चेतावनी दिएको छ। यस्तो अवस्थाले दैनिक जनजीवनसँगै कृषि, स्वास्थ्य, पर्यटन, पर्वतारोहण, सडक तथा हवाई यातायात, उद्धार र राहत कार्यमा समेत असर पार्न सक्ने विभागको भनाइ छ। मौसम पूर्वानुमानअनुसार हाल देशभर मनसुनी वायुको प्रभाव छ र मनसुनको न्यूनचापीय रेखा औसत स्थानभन्दा केही उत्तरतर्फ रहेको छ। उत्तर प्रदेश आसपास बनेको न्यूनचापीय क्षेत्रको समेत प्रभाव रहेको विभागले जनाएको छ।
विभागले भारी वर्षाको सम्भावना रहेका क्षेत्रका बासिन्दालाई सम्भावित बाढी, पहिरो र भूक्षयबाट जोगिन सतर्क रहन तथा मौसमसम्बन्धी पछिल्ला सूचना नियमित रूपमा हेर्न आग्रह गरेको छ। तीन दिनको पूर्वानुमानअनुसार जोखिमयुक्त क्षेत्रमा यात्रा तथा अन्य गतिविधि गर्दा विशेष सावधानी अपनाउनुपर्ने देखिएको छ।
Be the first to comment!
प्रतिक्रिया दिनुहोस