बुधवार, कार्तिक २५ गते २०८३
नेपाली कांग्रेसको १५औँ महाधिवेशनबाट तीन उपसभापति र तीन महामन्त्री निर्वाचित भएका छन्।
सोमवार , आश्विन २६, २०८३
नेपालसेज | काठमाडौं
कांग्रेसको १५औँ महाधिवेशनबाट उपसभापति र महामन्त्री पदमा नयाँ नेतृत्व निर्वाचित भएको छ। उपसभापतिमा चन्द्रकान्त भण्डारी, मधु आचार्य र विनोदकुमार चौधरी निर्वाचित भएका छन् भने महामन्त्रीमा प्रदीप पौडेल, उदयशमशेर राणा र डिला संग्रौला निर्वाचित भएका छन्। उपसभापतिका दुई खुला पदमा भण्डारी र आचार्य तथा एक समावेशी पदमा चौधरी निर्वाचित भएका हुन्। महामन्त्रीका दुई खुला पदमा पौडेल र राणा तथा महिला पदमा संग्रौलाले जित हासिल गरेकी छन्।
चन्द्रकान्त भण्डारी, मधु आचार्य र विनोदकुमार चौधरी उपसभापतिमा निर्वाचित।
प्रदीप पौडेल, उदयशमशेर राणा र डिला संग्रौला महामन्त्रीमा निर्वाचित।
खुला महामन्त्री पदमा प्रदीप पौडेलले सर्वाधिक ४ हजार १९४ मत प्राप्त गरे।
समावेशी उपसभापतिमा विनोदकुमार चौधरीले १ हजार ७४५ मत पाए।
महिला महामन्त्रीमा डिला संग्रौलाले महालक्ष्मी उपाध्याय ‘डिना’लाई २५४ मतले पराजित गरिन्।
.jpeg)
अन्तिम मतपरिणामअनुसार उपसभापतिमा भण्डारीले ३ हजार ७३५, आचार्यले २ हजार ३४२ र चौधरीले १ हजार ७४५ मत प्राप्त गरे। महामन्त्रीमा पौडेलले ४ हजार १९४, राणाले २ हजार ३३० र संग्रौलाले ३ हजार ११८ मत पाए। खुला महामन्त्री पदमा सुनिल शर्माले २ हजार २५७ मत प्राप्त गरे भने गुरुराज घिमिरेले १ हजार ५१३ र नैनसिंह महरले १ हजार १३४ मत पाए।
समावेशी उपसभापति पदमा चौधरीले निकटतम प्रतिस्पर्धी जीवन परियारलाई ८७ मतले पराजित गरे। परियारले १ हजार ६५८ मत प्राप्त गर्दा फरमुल्लाह मन्सुरले १ हजार १४४, सीता गुरुङले १ हजार ११२ र रञ्जित कर्णले ५६२ मत पाए। खुला उपसभापति प्रतिस्पर्धामा गोविन्द भट्टराईले १ हजार ७५२, सुरेन्द्रराज पाण्डेले १ हजार ६७३, धनराज गुरुङले १ हजार ५९६, दीपक गिरीले ९२३ र चन्द्रमोहन यादवले ७६० मत प्राप्त गरे।
महिला महामन्त्री पदमा संग्रौलाले महालक्ष्मी उपाध्याय ‘डिना’लाई २५४ मतले पराजित गरिन्। संग्रौलाले ३ हजार ११८ मत प्राप्त गर्दा उपाध्यायले २ हजार ८६४ र रीता खनालले ८०४ मत पाइन्। यससँगै संग्रौला नेपाली कांग्रेसको महामन्त्री बन्न सफल भएकी छन्।
विशेष महाधिवेशनबाट महामन्त्री बनेका पौडेल नियमित महाधिवेशनबाट पनि सोही पदमा निर्वाचित भएका छन्। उदयशमशेर राणा पनि विशेष महाधिवेशनबाट सहमहामन्त्री बनेका थिए। यसपटक महामन्त्रीमा निर्वाचित भएसँगै उनको पदोन्नति भएको छ। चन्द्रकान्त भण्डारी यसअघि पनि उपसभापति पदमा प्रतिस्पर्धा गरेका नेता हुन् भने मधु आचार्य विशेष महाधिवेशनको हस्ताक्षर अभियानमा सक्रिय थिए।
उद्योगी तथा व्यवसायी विनोदकुमार चौधरी २०७४ सालको प्रतिनिधिसभा निर्वाचनअघि नेपाली कांग्रेसमा प्रवेश गरेका थिए। उनी यसअघि नेकपा एमालेबाट पहिलो संविधानसभामा समानुपातिक सदस्य बनेका थिए। २०७९ सालको निर्वाचनमा नवलपरासी पश्चिम–१ बाट प्रत्यक्ष निर्वाचित भएका चौधरी यसपटक कांग्रेसको उपसभापति बनेका छन्।
Be the first to comment!
.gif)
प्रतिक्रिया दिनुहोस