बुधवार, कार्तिक २५ गते २०८३
शनिवार , आश्विन १०, २०८३
नेपालसेज/नागोया ।
जापानको नागोयामा जारी २०औँ एसियाली खेलकुदअन्तर्गत पुरुष क्रिकेटमा नेपाल समूह ‘ए’ को विजेता बन्दै क्वार्टरफाइनलमा प्रवेश गरेको छ। नेपाल र आयोजक जापानबीचको खेल वर्षाका कारण नतिजाविहीन भएपछि नेपालले समूहको शीर्ष स्थान सुरक्षित गरेको हो। जापानले टस जितेर नेपाललाई पहिले ब्याटिङको निम्तो दिएको थियो। नेपालले निर्धारित १५ ओभरमा ४ विकेट गुमाएर १४९ रन बनाएको थियो। तर वर्षाका कारण जापानको इनिङ्स सुरु हुन नसकेपछि खेल रद्द भएको हो।
नेपाल समूह ‘ए’ को विजेता बन्दै क्वार्टरफाइनलमा प्रवेश गरेको छ।
जापानविरुद्धको खेल वर्षाका कारण नतिजाविहीन बनेपछि दुवै टोलीले एक–एक अंक पाएका छन्।
नेपालले १५ ओभरमा ४ विकेट गुमाएर १४९ रन बनाएको थियो।
सन्दीप जोरा र लोकेश बमले अर्धशतक प्रहार गर्दै नेपाललाई बलियो योगफलमा पुर्याएका थिए।
अफगानिस्तानलाई ५ विकेटले हराएको नेपालले समूह चरणमा अपराजित रहँदै शीर्ष स्थान हासिल गरेको छ।
.jpeg)
नेपालका लागि सन्दीप जोरा र लोकेश बमले अर्धशतक प्रहार गरे। जोरा ३२ बलमा ५७ रनमा नटआउट रहे भने लोकेश बमले २२ बलमा ५२ रन बनाए। दुवैको आक्रामक ब्याटिङले नेपाललाई छोट्याइएको खेलमा १४९ रनको बलियो योगफल बनाउन सहयोग गर्यो।
यसअघि नेपालले आफ्नो पहिलो खेलमा अफगानिस्तानलाई ५ विकेटले पराजित गरेको थियो। अफगानिस्तानले दिएको १०३ रनको लक्ष्य नेपालले १७.२ ओभरमा ५ विकेट गुमाएर पूरा गरेको थियो। उक्त जितपछि नेपाललाई जापानविरुद्धको खेलमा समूहको शीर्ष स्थानका लागि बराबरी पर्याप्त हुने अवस्था बनेको थियो।
जापानविरुद्धको खेल नतिजाविहीन भएपछि नेपालले समूह चरणमा ३ अंकसहित शीर्ष स्थान हासिल गरेको छ। अफगानिस्तान २ अंकसहित दोस्रो स्थानमा रहँदै क्वार्टरफाइनलमा पुगेको छ भने आयोजक जापान प्रतियोगिताबाट बाहिरिएको छ।
यससँगै नेपालले एसियाली खेलकुदको पुरुष क्रिकेटमा क्वार्टरफाइनलको यात्रा तय गरेको छ। नेपालले अब नकआउट चरणमा पदक यात्राका लागि प्रतिस्पर्धा गर्नेछ।
Be the first to comment!
.gif)
प्रतिक्रिया दिनुहोस