नेपालसेज/ काठमाडौँ।
प्रधानमन्त्री वालेन्द्र शाहले प्रहरी सेवामा पेशागत सफलता हासिल गर्न नैतिकता, निष्ठा र इमानदारीलाई पहिलो सर्तका रूपमा लिनुपर्ने बताएका छन्। उनले तालिममा सिकेका कुरा व्यवहारमा उतार्दै जिम्मेवारीप्रति जवाफदेही हुन दीक्षित प्रहरी निरीक्षकहरूलाई निर्देशन दिएका छन्। राष्ट्रिय प्रहरी प्रतिष्ठान महाराजगञ्जमा आइतबार आयोजित प्रहरी निरीक्षक आधारभूत तालिमको १८४औँ समूहको दीक्षान्त समारोहमा प्रधानमन्त्री शाहले यस्तो बताएका हुन्। उनले प्रहरी सेवामा पेशागत आचरण र अनुशासन कायम गर्दै संविधान, प्रचलित कानुन, नियम, कार्यविधि तथा मापदण्डको पालना गर्नुपर्नेमा जोड दिएका छन्।

सम्पादकीय सारांश

Verified

प्रहरी निरीक्षक आधारभूत तालिमको १८४औँ समूहबाट ७९ जना दीक्षित भएका छन्।

प्रधानमन्त्री वालेन्द्र शाहले नैतिकता, निष्ठा र इमानदारीलाई पेशागत सफलताको आधार बताएका छन्।

दीक्षित प्रहरी निरीक्षकलाई संविधान र प्रचलित कानुनअनुसार काम गर्न निर्देशन दिइएको छ।

अनुचित प्रभावमा नपरी निष्पक्ष र तथ्यपरक अनुसन्धान गर्न प्रधानमन्त्रीले जोड दिएका छन्।

अपराध अनुसन्धानलाई छिटो, छरितो र प्रभावकारी बनाउन सूचना प्रविधिको प्रयोगमा जोड दिइएको छ।

प्रधानमन्त्री शाहले नेपाल प्रहरीले देशमा शान्ति सुरक्षा कायम गर्ने, अपराध अनुसन्धान गर्ने र नागरिकका स्वतन्त्रताको रक्षा गर्ने जिम्मेवारी निष्पक्ष रूपमा निर्वाह गर्नुपर्ने बताएका छन्। उनले कुनै पनि अनुचित प्रभावमा नपरी भेदभावरहित ढंगले कर्तव्यमा कटिबद्ध रहन दीक्षित प्रहरी निरीक्षकहरूलाई निर्देशन दिएका छन्। उनले प्रहरी संगठनभित्र पूर्ण प्रतिबद्धताका साथ सहयोग र सहकार्य गर्न पनि आग्रह गरेका छन्। प्रहरीको भूमिका र संस्थाको गतिलाई बुझेर नागरिकको भावना अनुरूप काम गर्नुपर्ने उनको भनाइ छ।

प्रधानमन्त्री शाहले सूचना प्रविधिको प्रयोगबाट प्रहरीको काम छिटो, छरितो, सहज र पारदर्शी बनाउन सकिने बताएका छन्। प्रविधिको सदुपयोगले समयमै अपराध अनुसन्धान गर्न तथा घटनालाई नियन्त्रणमा लिन सहयोग पुग्ने उनले उल्लेख गरेका छन्। अपराधको निष्पक्ष, तथ्यपरक, वैज्ञानिक र प्रविधिमुखी अनुसन्धानका लागि सूचना प्रविधिको सही प्रयोग आवश्यक रहेको पनि उनले बताएका छन्।

प्रहरी संगठनको नेतृत्व र प्रशिक्षणले अनुसन्धानलाई प्रभावकारी बनाउन महत्त्वपूर्ण भूमिका खेल्ने उल्लेख गर्दै प्रधानमन्त्री शाहले सरकारले अनुसन्धानका लागि आवश्यक स्रोतसाधन उपलब्ध गराउन र प्रहरीप्रतिको जिम्मेवारी पूरा गर्न प्रतिबद्ध रहेको बताएका छन्।

समारोहमा ७९ जना प्रहरी निरीक्षक दीक्षित भएका छन्। प्रधानमन्त्री शाहले दीक्षित प्रहरी निरीक्षकहरूलाई बधाई दिँदै सफलताको कामना गरेका छन्। प्रहरी सेवामा आबद्ध हुन प्रेरित गर्ने परिवारजनप्रति पनि उनले आभार व्यक्त गरेका छन्।