नेपालसेज/ काठमाडौं।
सरकारले नेपालको औद्योगिक विकास र व्यापार सहजीकरण गर्ने उद्देश्यले नेपाल प्रत्यायन केन्द्र स्थापना गरेको छ। त्रिपुरेश्वरस्थित केन्द्रको बुधबार उद्योग, वाणिज्य तथा आपूर्तिमन्त्री दीपककुमार साहले उद्घाटन गरेका छन्। उद्घाटन कार्यक्रममा मन्त्री साहले केन्द्रको सञ्चालनले उद्योगको लागत घटाउने, उपभोक्ताको विश्वास बढाउने र नेपाली उत्पादनलाई विश्व बजारसँग जोड्ने दिशामा महत्त्वपूर्ण भूमिका खेल्ने विश्वास व्यक्त गरेका छन्।

सम्पादकीय सारांश

Verified

सरकारले औद्योगिक विकास र व्यापार सहजीकरणका लागि नेपाल प्रत्यायन केन्द्र स्थापना गरेको छ।

उद्योगमन्त्री दीपककुमार साहले केन्द्रको उद्घाटन गरेका छन्।

प्रयोगशाला, मेडिकल ल्याब तथा निरीक्षण र प्रमाणीकरण गर्ने संस्थाले नेपालमै प्रत्यायन सेवा पाउने आधार तयार।

परीक्षण र प्रमाणीकरणमा लाग्ने समय तथा खर्च घटाउन सहयोग पुग्ने अपेक्षा।

नेपाली उत्पादनको गुणस्तरप्रति अन्तर्राष्ट्रिय विश्वास बढाउँदै निर्यात व्यापार सहज बनाउने लक्ष्य।

नेपाली उद्योगलाई प्रतिस्पर्धी बनाउने, उपभोक्ताले गुणस्तरीय र सुरक्षित वस्तु तथा सेवा प्राप्त गर्ने सुनिश्चितता बढाउने र नेपाली उत्पादनलाई अन्तर्राष्ट्रिय बजारमा स्थापित गर्ने उद्देश्यले केन्द्र स्थापना गरिएको हो। उद्योग, वाणिज्य तथा आपूर्ति मन्त्रालयका अनुसार केन्द्र सञ्चालनमा आएसँगै प्रयोगशाला, मेडिकल ल्याब तथा निरीक्षण र प्रमाणीकरण गर्ने संस्थाले नेपालमै प्रत्यायन सेवा प्राप्त गर्ने आधार तयार भएको छ। यसले उद्योगी तथा व्यवसायीको परीक्षण र प्रमाणीकरणसम्बन्धी समय र खर्च घटाउन, गुणस्तर सुधार गर्न तथा विदेशी निकायमाथिको निर्भरता कम गर्न सहयोग पुग्नेछ।

केन्द्रको स्थापनापछि खाद्य पदार्थ, औषधिजन्य उत्पादन, निर्माण सामग्री र विद्युतीय उपकरणलगायत वस्तुको गुणस्तर परीक्षण गर्ने संस्थाको विश्वसनीयता बढ्ने अपेक्षा गरिएको छ। यसबाट आम उपभोक्ताको स्वास्थ्य, सुरक्षा र हित संरक्षणमा सकारात्मक योगदान पुग्ने मन्त्रालयको विश्वास छ। मन्त्रालयद्वारा जारी विज्ञप्तिमा नेपालको निर्यात व्यापार सहज बनाउन अन्तर्राष्ट्रिय प्रत्यायन तथा पारस्परिक मान्यताको व्यवस्था गर्न केन्द्रले महत्त्वपूर्ण भूमिका खेल्ने उल्लेख गरिएको छ। यसले नेपाली उत्पादनको गुणस्तरप्रति अन्तर्राष्ट्रिय विश्वास बढाउन तथा निर्यातकर्ताको लागत र प्रक्रियागत झन्झट घटाउन सहयोग पुग्ने जनाइएको छ।

नागरिकले सुरक्षित वस्तु पाउने, उद्योगीले अनावश्यक खर्च र झन्झटबाट मुक्ति पाउने तथा नेपाली उत्पादनले विश्व बजारमा सम्मानजनक स्थान बनाउने उद्देश्यसहित केन्द्र स्थापना गरिएको मन्त्रालयले जनाएको छ।